‘T begos allemaol op 5 oktoeaber oppe Hunselerdiek.
Dao waerde ich as 3e van 4 jonges thoes oppe boorderie gebore.
As kindj waas ich altied al veul boete te vinje. Thoes op ’t landj, mer ouch bie os bure, Chris en Netty. Mien 3e opa en oma. Ich kwaam in eder geval neet dök met zuuver kleier thoes.
Ich ging nao de bassisjoeël in os dörp, op t fietske en den tösse de middig thoes aete. En den weer net oppe tied trök op sjoeël… en soms net neet oppe tied.
Daonao höb ich miene lieërweeg vervolgdj op ’t st. Ursula in Haor. De HAVO höb ich netjes in 5 jaor aafgerondj, al waas ich dök lever mèt anger dinger bezig den lieëre.
Ich waas geine fan van lieëre, mer wist waal good wie ‘t grafisch raekenmesjien wirkte.
Ich höb genote van miene sjoealtied en bön dök zat oppe teruukweeg gestoptj biej de Spar veur ‘n frikandelbruedje en ‘n blikske drinke.
Nao de middelbare sjoeël bön ich nao Haerle electrical enigeering gaon studere. Dao höb ich snel miene fiets ingeruuldj veur ‘nne auto. Want de trein en de bus det vonj ich toch mer niks.
In mien lètste jaor höb ich stage geloupe biej Greymans Paktech in Rooij en dao wirk ich tot oppe daag van vandaag as programmeur van verpakkingsmachines.
In os dörp bön ich lang biej de voetbalclub gewaesj, mer naodet ich de bal op eine maeter veur de goal euversjoot kwoom ich d’r achter det ich baeter mèt get angers kan sjete as ‘nne voetbal.
Ich kwoom via ome Chris biej de sjutterie en in 2016 bön ich ouch buksemeister gewoore. Ongertusse höb ich al mieërdere kieëre mètgesjote op ’t OLS. Dit jaor höb ich mich in eige dörp keuning gesjote!
Aug bön ich hieël get jaore actief gewaesj veur os jeugdvereiniging KO Kids, waekelijkse activiteite en as hoeëgtepuntj op kamp. Ich waas altied dao as ich kos en den ouch altied in veur get streek en kattekwaod.
Mèt mien vrunj drink ich gaer same ein pilske en wae zeen al hieël get jaore eine gezellige biejeingeraapdje groep dae oug dök te vinje is Bie de Tied.
Ouch ein good brandjend kampveur bringtj os dök biejein, den lekker sjaele zeiver verkaupe en get streek oethaole. Den is d’r net as biej de vastelaovendj aan gezelligheid gein gebrek.
Mer noe genog euver mich, wae gaon noe
Neet sleutele, sjeete, of programere, mer vastelaovendj vere!
Alaaf!
